الخميس 22 أكتوبر 2020 الموافق 05 ربيع الأول 1442
رئيس مجلس الإدارة
أحمد عمر
رئيس التحرير
خالد ناجح

قلب التلج.. قصيدة بالعامية يكتبها محمد عبد الحميد دغيدي

الخميس 01/أكتوبر/2020 - 12:33 ص
الهلال اليوم
شعر :
طباعة

*عصفورتين..

كانوا عصفورتين

رايحين جايين

بيخطوا يدوب شباك الأوضه

                            و يرجعوا تانى..

                              مالى ودانى!

مالى ودانى كلامك لكن

كلمه بكلمه بتمرق تخبط

                          وش الحيطه

و تفضل جوه شفايفك أو

       على طرف لسانك

                             جايز!!

.. قمت موسع حبه الشيش

شبطوا برجليهم ف السلك

                          و طلوا لجوه..

بصوا لبعض و جريوا قوام!

.. حلو عتابك

اخر مره عاتبتك فيها

قبل البيت ده بشهر و نص!

مع ان الكبايه بتبرق

و الضلمه بتلمع ف عينينا

لملامحك البصه بتحرن..

بتعافر و كأن عليها

علو السقف و عرضه

                          تراب!!

.. ضى الشمس يدوبك غاب

نقط ريشهم ع البرواز

و اتهدل من طول الرعشه..

سرسب ضيقى بريحة المطره

خوفى عليها و هى بتنفض

ريشها اتاخرت وقعت فجأه

قام رمى نفسه التانى وراها..

.. صوتى المحنى قبالك

                          شدك

من وقتك و حاجاتك و انتى!

فاكره ايديكى و هى ف ايدى؟

كنت باحاسب قوى

                   و انا شايف

دقة قلبك ملو كفوفى..

دلوقتى بحالك ف ايديه

          ووجودك مطروح

                           من شوفى!!

دندن ريح الجو دفاه

لما لمحت العصفورتين

فاردين ع الاخر

                   جناحاتهم

متلامسين

              بيوشوشوا بعض..

و انتى سؤالك

جوه سكاتى:

ازاى فيه خط اسود شايفه

على صورتى المحطوطه

                                 هناك؟!!